Herritarren zientzian oinarritutako STEAM proiektua da, Zientzia, Teknologia, Ingeniaritza, Artea eta Matematika uztartzen dituena Euskal kostaldeari buruzko ezagutza handitzeko helburuz. Zehazki, eskala mikroskopikoko biodibertsitatean (meiofaunan eta mikroalgetan) eta horiek arriskuan jartzen dituzten elementuetan (plastikoetan esaterako) jartzen du arreta.
Proiektu honen bidez, bi helburu nagusi lortu nahi dira:
- Kostaldea herritarrei hurbiltzea, bertan bizi diren bizidun txikien inguruko ezagutza handitu dezaten.
- Parte-hartzaileak ingurumena zaintzeko beharraz sentsibilizatzea, bereziki itsas ingurumena zaintzeko beharraz.
Zer egingo da?
Gure inguruko hondartzetan laginduko dugu, arreta orohar oharkabean pasatzen diren elementu txikienetan jarriz, eskala mikrokopikoa behatzeko:
- Hondar artean bizi diren organismo txikiak: mikro eta mesofauna
- Uretan bizi diren organismo txikiak: zoo eta fitoplanktona
- (mikro)plastikoen kutsadura
Horretarako, talde bakoitzak bere laginketa materiala prestatuko du. Parte hartzen duten talde bakoitzaren ezaugarrien arabera egokitutako jarraibideak eta materiala erabiliz, eta prozedura zientifikoak erabiliz, mikrofaunako eta mikroflorako espezie bereizgarrienak aurkituko dituzte, baita plastikoak ere!
Gure DBH3ko ikasleak atzo hasi ziren proiektuarekin. Plentziako hondartzara hurbildu ziren goizean eta arratsaldean, laborategian aritu ziren mikroskopikoekin lanean.
